Un Se Do Aankh Se Aansu Bhi Bahae Na Gae

Poet

un se do aankh se aansu bhi baha.e na ga.e

qabr-e-ashiq ke nishan bhi to miTa.e na ga.e

ham miTe bhi to miTe ḳhaak jo hasrat na miTi

ham ga.e bhi to ga.e kya jo bula.e na ga.e

bazm-e-dushman men abhi the abhi apne ghar men

aa ke yuun baiThe ki jaise kahin aa.e na ga.e

barq kahiye ki chhalava jo chamak dikhla kar

is tarah aa.e ki aa.e bhi aur aa.e na ga.e

hain vo ‘ashiq’ ki jagah pa ke na nikle dil se

yaad aa.e to junun mujh se bhula.e na ga.e