Shauq Mahri
un ke gesu ki tarah apne ḳhayalon ki tarah
ham bikharte rahe duniya men ujalon ki tarah
ham to iḳhlas-o-mohabbat ke siva kuchh bhi na the
dekhta koi hamen dekhne valon ki tarah
ham se pabandi-e-adab-e-mohabbat na hui
baat bhi un se agar ki hai to nalon ki tarah
main hi ik gardish-e-dauran se pareshan nahin
saari duniya hai pareshan tire balon ki tarah
main kisi gham kisi tufan se mayus nahin
zindagi main ne guzari hai jiyalon ki tarah
koi to baat hai ai ‘shauq’ chhupate kyuun ho
be-sabab aankh chhalakti nahin pyalon ki tarah
Leave a Reply