Nafas Ambalvi
umr-bhar dard ke rishton ko nibhane se raha
zindagi men to tire naaz uThane se raha
jab bhi dekha to kinaron pe taḌapta dekha
ye samundar to miri pyaas bujhane se raha
bas yahi soch ke sar apna qalam kar Daala
ab vo ilzam mire sar to lagane se raha
is zamane men jahalat se guzar hoti hai
ab hunar se to koi ghar ko chalane se raha
ham hi tarkib karen koi ujalon ke liye
ab andhera to charaghon ko jalane se raha
vaqt ke marmarin patthar pe ghazal likhta huun
ye ibarat koi mausam to miTane se raha
be-ta.alluq to nahin umr guzari hai ‘nafas’
rishta-e-ghair sahi kuchh to zamane se raha
Leave a Reply