aaj dil hai ki sar-e-sham bujha lagta hai
ye andhere ka musafir bhi thaka lagta hai
apne bahke hue daman ki ḳhabar li na ga.i
jis ko dekho charaghon se ḳhafa lagta hai
baagh ka phuul nahin lala-e-sahra huun main
lu ka jhonka bhi mujhe bad-e-saba lagta hai
tangi-e-zarf-e-nazar kasrat-e-nazzara-e-dahar
pyaas kachchi ho to har jaam bhara lagta hai
kis takalluf se girah khol raha huun dil ki
uqda-e-dard tira band-e-qaba lagta hai
ḳhar-zaron ko sikha de na gulistan ka chalan
ye musafir to koi abla-pa lagta hai
dekh tu rauzan-e-zindan se zara su-e-chaman
aaj kyuun dil ka har ik zaḳhm hara lagta hai
kaun ‘afzal’ ke siva aisi ghazal chheḌega
dosto ye vahi ashufta-nava lagta hai
Leave a Reply