ulfat ke imtihan men aghyar fail nikle
the paas ek ham hi jo jaan pe khel nikle
tegh-o-sinan ko rakh do ankhen laḌao ham se
achchhi hai vo laḌa.i jis men ki mel nikle
dekha jo nuur us ka to khul ga.i hain ankhen
duniya-o-din ke jhagḌe bachchon ka khel nikle
ummid nekiyon ki rakkho na tum buron se
mumkin nahin khali se hargiz jo tel nikle
kab kohkan se uTTha koh-e-giran se ulfat
in saḳhtiyon ko ‘kaifi’ kuchh ham hi jhel nikle
Leave a Reply