ujle mathe pe naam likh rakkhen
ḳhvahishon ka maqam likh rakkhen
phir havas ko hai hasrat-e-parvaz
aap dana-o-dam likh rakkhen
varna ham is ko bhuul ja.enge
sabz harfon men naam likh rakkhen
jaane kis samt kal hava le jaa.e
lamha-e-shad-kam likh rakkhen
apne hone ka kuchh yaqin kar len
ret par naqsh-o-nam likh rakkhen
shab ko ThiThurenge sab dar-o-divar
dhuup kuchh apne naam likh rakkhen
zardiyan oḌhne laga suraj
nama-e-ḳhauf-e-sham likh rakkhen
piile piile badan hua mausam
piila piila tamam likh rakkhen
aane vaale udaas naslon ke
silsila-var naam likh rakkhen
Leave a Reply