udhar vo be-muravvat bevafa be-rahm qatil hai
idhar be-sabr-o-be-taskin-o-be-taqat mira dil hai
udhar sayyad chashm-o-dam-e-zulf-o-navak-e-mizhgan
idhar pahlu men dil ik said-e-laghar nim-bismil hai
udhar us ko to mere naam se bhi nang hai har-dam
idhar siine men dil mushtaq hai ashiq hai maa.il hai
udhar vo ḳhud-parast ayyar hai maghrur hai ḳhud-bēn
idhar mera dil az-ḳhud-rafta hai shaida.i ghafil hai
udhar har roz ka us ko ḳhilaf-e-va.ada hai asan
idhar shab-ta-sahar-gah intizari saḳht mushkil hai
udhar ḳhush sair-e-dariya se hai vo na-ashna zalim
idhar ham gharq-e-bahr-e-gham hain aur napaid sahil hai
udhar barq-e-nigah hai sabr ke ḳhirman ki atish-zan
idhar kisht-e-ummid-o-yas ab tak sair-e-hasil hai
udhar shane ko us ke zulf-o-kakul ne chaḌhaya sar
idhar dil par bala-e-asman yak-dast nazil hai
udhar baaqi havas hai be-hisab us ko jafaon ki
idhar likhiye vafaon ki to kuchh apna hi fazil hai
udhar vo aa.ine men aks-e-ru apne ka hai maa.il
idhar har shai men vo hai jalva-gar-e-shakl-o-shama.il hai
udhar hai iḳhtilat aghyar se us yar-e-jani ka
idhar dil zikr us ke ka ‘muhib’ din raat shamil hai
Leave a Reply