Moin Ahsan Jazbi
udasiyon ke siva dil ki zindagi kya hai
koi bata.e ki ḳhvabon ki barhami kya hai
kabhi chaman se jo guzre chaman se ḳhud puchhe
saba mizaj-e-chaman ham se puchhti kya hai
ye tiragi-e-musalsal hazar baar qubul
magar ye daur charaghon ki raushni kya hai
ye ahl-e-dil ki uḌate hain mere gham ka mazaq
ye be-hisi jo nahin hai to be-hisi kya hai
na puchh mujh se jo kar-e-savab men hai maza
ye puchh mujh se gunahon men dilkashi kya hai
masham-e-jan na mo.attar ho jis se vo gul kya
jo nashsha la na sake vo sharab hi kya hai
nazar se duur hai ‘jazbi’ savad-e-manzil tak
na jaane zauq-e-talab men mire kami kya hai
Leave a Reply