udaas kaghzi mausam men rang o bu rakh de
har ek phuul ke lab par mira lahu rakh de
zaban-e-gul se chaTanen tarashne vaale
nigar o naqsh men asa.ish-e-numu rakh de
suna hai ahl-e-ḳhirad phir chaman saja.enge
junun bhi jeb o gareban pa-e-rafu rakh de
shafaq hai phuul hai dipak hai chand bhi hai magar
unhin ke saath kahin saghar o subu rakh de
chala hai janib-e-mai-ḳhana aaj phir vaa.iz
kahin na jaam pe lab apne be-vazu rakh de
tamam shahr ko apni taraf jhuka lunga
gham-e-habib mire sar pe haath tu rakh de
giran lage hai jo ehsan dast-e-qatil ka
uTh aur tegh ke lab par rag-e-gulu rakh de
ḳhuda kare mira munsif saza sunane par
mira hi sar mire qatil ke ru-ba-ru rakh de
samundaron ne bulaya hai tujh ko ai ‘bekal’
tu apni pyaas ki sahra men aabru rakh de
Leave a Reply