tumhari yaad ka ik silsila rahi ḳhushbu
bahar ban ke mira rasta rahi ḳhushbu
gale lagaya mujhe maan ne alvida.a kaha
tamam umr miri rah-numa rahi ḳhushbu
ajiib rishta hai barish ka kachchi miTTi se
falak se arz talak rabta rahi ḳhushbu
hasin gulab bhi ab mo’atabar nahin Thahre
aur us ki baton se bargashta ho ga.i ḳhushbu
kiye hain nazr bahut phuul is mohabbat men
dayar-e-ishq men tab dil-ruba rahi ḳhushbu
kisi ne haath milaya tha ‘sima’ chahat se
hatheliyon men hamari sada rahi ḳhushbu
Leave a Reply