Tumhaare Shahr Mein Dekhun to Kya Nahin Milta

tumhāre shahr meñ dekhūñ to kyā nahīñ miltā

bas apne ghar ke liye rāsta nahīñ miltā

uruuj par hai na.e mausamoñ kā jāh-o-jalāl

shajar pe koī bhī patta harā nahīñ miltā

abhī abhī koī āñdhī idhar se guzrī hai

rah-e-hayāt mujhe naqsh-e-pā nahīñ miltā

bichhaḌ ke tujh se tabī.at uchāT rahtī hai

ḳhud apne ghar meñ bhī ghar kā mazā nahīñ miltā

tumheñ bhī roz kahānī vahī sunānī hai

mujhe bhī ḳhvāb koī dūsrā nahīñ miltā

matā-e-barg-o-samar bhī luTā chuke ashjār

kisī tarah bhī mizāj-e-havā nahīñ miltā

maiñ kis tarah se ‘zafar’ mas.aloñ ko suljhā.ūñ

kisī bhī baat kā koī sirā nahīñ miltā

Leave a Comment