Tumhaare Gham Se Tauba Kar Raha Hun

tumhāre ġham se tauba kar rahā huuñ

ta.ajjub hai maiñ aisā kar rahā huuñ

hai apne haath meñ apnā girebāñ

na jaane kis se jhagḌā kar rahā huuñ

bahut se band taale khul rahe haiñ

tire sab ḳhat ikaTThā kar rahā huuñ

koī titlī nishāne par nahīñ hai

maiñ bas rañgoñ kā pīchhā kar rahā huuñ

maiñ rasman kah rahā huuñ ”phir mileñge”

ye mat samho ki va.adā kar rahā huuñ

mire ahbāb saare shahr meñ haiñ

maiñ apne gaañv meñ kyā kar rahā huuñ

mirī har ik ġhazal aslī hai sāhab

ka.ī barsoñ se dhanda kar rahā huuñ

Leave a Comment