tumhare gham se tauba kar raha huun
ta.ajjub hai main aisa kar raha huun
hai apne haath men apna gireban
na jaane kis se jhagḌa kar raha huun
bahut se band taale khul rahe hain
tire sab ḳhat ikaTTha kar raha huun
koi titli nishane par nahin hai
main bas rangon ka pichha kar raha huun
main rasman kah raha huun ”phir milenge”
ye mat samho ki va.ada kar raha huun
mire ahbab saare shahr men hain
main apne gaanv men kya kar raha huun
miri har ik ghazal asli hai sahab
ka.i barson se dhanda kar raha huun
Leave a Reply