Tumhaare Bin Ab Ke Jaan-e-Jaan Maine Id Karne Ki Than Li Hai

tumhare bin ab ke jan-e-jan main ne iid karne ki Thaan li hai

ghamon ke ek ek pal se ḳhushiyan kashid karne ki Thaan li hai

main us ki baton ka zahr apni ḳhamoshiyon men utaar lunga

agar muzir hai to main ne us ko mufid karne ki Thaan li hai

talash ki shiddaton ne arz-o-sama ki sab duriyan miTa diin

so main ne ab teri justuju ko shadid karne ki Thaan li hai

machine bona hai jin ka pesha unhen zamin bech di hai tum ne

kisan ho kar ḳhud apni miTTi palid karne ki Thaan li hai

ye meri tahzib ka asasa hi meri pahchan ban sakega

tamam kohna rivayaton ko jadid karne ki Thaan li hai

siyah shab ka ghanim shayad ki aa gaya raushni ki zad men

sabhi charaghon ko jis ne ‘azim’ shahid karne ki Thaan li hai

Leave a Comment