Poet
tum vafa ka evaz jafa samjhe
ai buto tum se bas khuda samjhe
paan kha kar jo aae maqtal men
kya shahidon ka khun-baha samjhe
sar qalam karne ka tha khat men jo haal
us ka mazmun ham juda samjhe
kab vo talvon se ankhen malne de
jo ki mizhgan ko khar-e-pa samjhe
ho gaya jab qalam hamara sar
apni qismat ka tab likha samjhe
daude kya ho ke khush su-e-maqtal
us ke ham ghar ka rasta samjhe
kisi surat se ham ko aane de
kaash darvaze ka gada samjhe
yad-e-dandan men jo baha aansu
us ko ham durr-e-be-baha samjhe
chandni par vo phir rakhe na qadam
ham faqiron ka boriya samjhe
teri abru ko jo hilal kaha
mah-e-nau se bhi kuchh siva samjhe
marun to vo javab-e-nama likhe
khat na aane ka muddaa samjhe
haath utha kar laga jo kosne vo
vaah re ham use dua samjhe
jo hai begana ashna hai vo
ham jo kahte hain koi kya samjhe
ham ko nazron se pisti hain aap
chashm-e-bad duur tutiya samjhe
jab se us kuche men qadam rakkha
kimiya ko bhi khak-e-pa samjhe
tujh ko o naujavan kaha be-misl
aaj maani-e-la-fata samjhe
ham ne jab dekhi chandni chhitki
teri utri hui qaba samjhe
kasa-e-mah jab se dekh liya
tab se gardun ko ham gada samjhe
apne fahmid puchh mat ‘goya’
kuchh na samjhe ye barha samjhe
Leave a Reply