Tum Se chhuT Kar Zindagi Ka Naqsh-E-Pa Milta Nahin

Akhtar Saeed Khan

tum se chhuT kar zindagi ka naqsh-e-pa milta nahin

phir raha huun ku-ba-ku apna pata milta nahin

main huun ya phirta hai koi aur mere bhes men

kis se puchhun koi surat-ashna milta nahin

naqsh-e-hairat hi na tha pursan-e-hal-e-gham bhi tha

tum ne jo toḌa hai ab vo a.ina milta nahin

na-umidi harf-e-tohmat hi sahi kya kijiye

tum qarib aate nahin ho aur ḳhuda milta nahin

us ke dil se apna andaz-e-taghaful puchhiye

jis ke dil ko dard ka bhi aasra milta nahin

ik na ik rishta isi duniya se tha apna kabhi

sochta huun aur koi silsila milta nahin

koi saa.e ki tarah chalta hai ‘aḳhtar’ saath saath

dostdar-e-dil hai lekin barmala milta nahin