Taimur Hasan
tum koi is se tavaqqo na lagana mare dost
ye zamana hai zamana hai zamana mire dost
samne to ho tasavvur men kahani koi
ik haqiqat se baḌa ek fasana mire dost
mere beTe main tumhen dost samajhne laga huun
tum baḌe ho ke mujhe duniya dikhana mire dost
dekh sakta bhi nahin mujh ko zarurat bhi nahin
meri tasvir magar us ko dikhana mire dost
kahne vaale ne kaha dekh ke chehra mera
gham-e-ḳhazana hai ise sab se chhupana mire dost
teri mahfil ke liye ba.is-e-barkat hoga
na-muradan-e-mohabbat ko bulana mire dost
tum ko ma.alum to hai mujh pe jo guzri ‘taimur’
puchh kar mujh se zaruri hai rulana mire dost
Leave a Reply