tum ho jo kuchh kahan chhupaoge
likhne vaalo nazar to aaoge
jab kisi ko qarib paoge
za.iqa apna bhuul jaoge
aa.ina hairaton ka ḳhvab nahin
ḳhud se aage bhi ḳhud ko paoge
ye hararat lahu men kai din ki
ḳhud-ba-ḳhud us ko bhuul jaoge
andhiyan roz mujh se puchhti hain
ghar men kis din diya jalao.ge
saaya roke hue hai raah safar
tum ye divar kab giraoge
ab jo aa.e bhi tum to kya hoga
ḳhud dikhoge mujhe dikhaoge
yahi hoga ki tum dar-e-jan par
dastaken de ke lauT jaoge
vo jo ik shaḳhs mujh men zinda tha
us ko zinda kahan se laoge
aise mausam guzar ga.e hain ki ab
mujh ko bhi mujh sa tum na paoge
jo lahu men diye jalati thiin
aisi shamen kahan se laoge
ḳhvahishon ke hisar men ghir kar
rasta ghar ka bhuul jaoge
Leave a Reply