tum apni zaban ḳhali kar ke ai nukta-varo pachhtaoge
main ḳhuub samajhta huun us ko jo baat mujhe samjhaoge
ik main hi nahin huun tum jis ko jhuTa kah kar bach jaoge
duniya tumhen qatil kahti hai kis ko kis ko jhuTlaoge
ya rahat-e-dil ban kar aao ya afat-e-dil ban kar aao!
pahchan hi lunga main tum ko jis bhes men bhi tum aaoge
har baat bisat-e-alam men manind-e-sada-e-gumbad hai
auron ko bura kahne vaalo tum ḳhud bhi bure kahlaoge
phir chain na paoge ‘aḳhtar’ is dard ki maari duniya men
is dar se agar uTh jaoge dar, dar ki Thokar khaoge
Leave a Reply