Dagh Dehlvi
tum a.ina hi na har baar dekhte jaao
miri taraf bhi to sarkar dekhte jaao
na jaao hal-e-dil-e-zar dekhte jaao
ki ji na chahe to na-char dekhte jaao
bahar-e-umr men bagh-e-jahan ki sair karo
khila hua hai ye gulzar dekhte jaao
yahi to chashm-e-haqiqat nigar ka surma hai
niza-e-kafir-o-din-dar dekhte jaao
uThao aankh na sharmao ye to mahfil hai
ghazab se janib-e-aghyar dekhte jaao
nahin hai jins-e-vafa ki tumhen jo qadr na ho
banenge kitne ḳharidar dekhte jaao
tumhen gharaz jo karo rahm pa.emalon par
tum apni shoḳhi-e-raftar dekhte jaao
qasam bhi khaa.i thi qur.an bhi uThaya tha
phir aaj hai vahi inkar dekhte jaao
ye shamat aa.i ki us ki gali men dil ne kaha
khula hai rauzan-e-divar dekhte jaao
hua hai kya abhi hangama aur kuchh hoga
fughan men hashr ke asar dekhte jaao
shab-e-visal adu ki yahi nishani hai
nishan-e-bosa-e-ruḳhsar dekhte jaao
tumhari aankh mire dil se le sabab be-vaj.h
hui hai laḌne ko tayyar dekhte jaao
idhar ko aa hi ga.e ab to hazrat-e-zahid
yahin hai ḳhana-e-ḳhummar dekhte jaao
raqib barsar-e-parḳhash ham se hota hai
baḌhegi muft men takrar dekhte jaao
nahin hain jurm-e-mohabbat men sab ke sab mulzim
ḳhata muaaf ḳhata-var dekhte jaao
dikha rahi hai tamasha falak ki nairangi
naya hai sho.abada har baar dekhte jaao
bana diya miri chahat ne ghairat-e-yusuf
tum apni garmi-e-bazar dekhte jaao
na jaao band kiye aankh rah-ravan-e-adam
idhar udhar bhi ḳhabar-dar dekhte jaao
suni-suna.i pe hargiz kabhi amal na karo
hamare haal ke aḳhbar dekhte jaao
koi na koi har ik sher men hai baat zarur
janab-e-‘dagh’ ke ash.ar dekhte jaao
Leave a Reply