tulu-e-sub.h-e-safar ki ghaḌi thi yaad aaya
juda.i rasta roke khaḌi thi yaad aaya
kisi ki ḳhanda-labi se bhi khul nahin paa.i
girah to ab ke dilon men paḌi thi yaad aaya
ye dil ke zaḳhm usi jang men ata hue hain
jo tere naam pe ḳhud se laḌi thi yaad aaya
jo mera vaqt mire haath aa nahin raha tha
miri kala.i pe teri ghaḌi thi yaad aaya
gale mile the bichhaḌte samay jab aḳhiri baar
vo shaam donon pe kitni kaḌi thi yaad aaya
ragen badan ki yunhi to nahin khinchi hui thiin
koi salib si dil men gaḌi thi yaad aaya
hui hai sarf na jaane kahan kahan ai ‘na.im’
durun-e-chashm nami to baḌi thi yaad aaya
Leave a Reply