tujh se baḌh kar nigah-e-lutf-o-ata kis ki thi
is ki ta.abir magar mere ḳhuda kis ki thi
shahr ke shor men sahraon ke sannaTe men
main khaḌa soch raha huun ki sada kis ki thi
main ne ḳhud apne lahu se ye chaman sincha tha
mujh se ab puchh rahe ho ki ḳhata kis ki thi
main ki a.ina tha phir sang-e-malamat kaisa
dil-e-ḳhun-gashta men tasvir-e-butan kis ki thi
ab ḳhad-o-ḳhal naqabon men nahin chhup sakte
jism ḳhud chiḳh uThega ki qaba kis ki thi
apne lahje men koi rang bharo ya na bharo
log pahchan ga.e tarz-e-ada kis ki thi
Leave a Reply