Wahshat Raza Ali Kalkatvi
tu hai aur aish hai aur anjuman-ara.i hai
main huun aur ranj hai aur gosha-e-tanha.i hai
sach kaha hai ki ba-ummid hai duniya qaa.im
dil-e-hasrat-zada bhi tera tamanna.i hai
dil ki fariyad jo sunta huun to ro deta huun
choT kambaḳht ne kuchh aisi hi to khaa.i hai
be-niyazi ki ada.en vo dikhate hain bahut
ḳhu-e-taslim miri un ko pasand aa.i hai
zulf barham mizha bargashta jabin chin-alud
meri bigḌi hui taqdir ki ban aa.i hai
adab-amoz bala ka hai taghaful un ka
shauq-e-pur-hausla ne ḳhuub saza paa.i hai
kahe deta huun kisi aur ki janib tu na dekh
kya ye kuchh kam hai ki ‘vahshat’ tira sauda.i hai
Leave a Reply