tohfa-e-gham bhi mila dard ki saughat ke ba.ad
phir bhi dil ḳhush na hua itni inayat ke ba.ad
umr-bhar DhunDte phirte hi rahe apna vajud
ḳhud se ham mil na sake un se mulaqat ke ba.ad
main huun jab tak to samajh lijiye sab kuchh hai yahan
kuchh na rah ja.ega duniya men miri zaat ke ba.ad
kitni tarikiyan guzrin to ujala dekha
husn aaya hai nazar kitne hijabat ke ba.ad
zindagi teri tavazo.a bhi main karta lekin
na bacha kuchh bhi lahu gham ki mudarat ke ba.ad
haath aa.e hue lamhat na chhoḌo varna
kuchh na haath aa.ega guzre hue lamhat ke ba.ad
aa.ega daur-e-masarrat bhi yaqinan ‘fazil’
kya nahin hoti hai duniya men sahar raat ke ba.ad
Leave a Reply