to aisa kyuun nahin kahte
ki ye sapne hi mere karb ke zamin hain un ke hi sabab se main
jhulaste reg-zaron men barahna-pa bhatakta huun
inhi parchhaiyon ko jism dene ki tamanna mujh se asaish ka har lamha
maze ki niind asabi sukun sab chhin leti hai
yahi vo zahr hai jis ne
mire khuun ke namak ko niim ke ras men badal daala
to aisa kyuun nahin kahte
ki main sapnon ke is arzang ko
suraj ki jalti bhattiyon men phenk duun sab kuchh jala dalun
kisi langar-shikasta naav ki manind dhare par ravan ho jaun
har ik mauj ke hamrah dubun aur ubhar aauun
to aisa kyuun na kar paae
vo jo kuchh mera hissa tha
mira virsa tha
mujh se chhin lete aur mujhe jangal ke behis ped ki manind uga dete
jo har mausam ke hamrah apna pairahan badalta hai
hava ke jhonke dete hain ijazat jis taraf badhne ki badhta hai
zamin ki narmiyon ko dekh kar apni jaden paivast karta hai
magar tum ye na kar paae
mira virsa na mujh se chhin paae aur vo pahla shakhs jis ne sab se pahla khvab dekha tha
abhi tak mujh men zinda hai
to aisa kyuun nahin karte
unhi sapnon unhi parchhaiyon ko jism de daalo
jinhen ik jism dene ki tamanna mujh se asaish ka har lamha
maze ki niind aasabi sukun sab chhin leti hai
Leave a Reply