Mera Dil Is Liye dhaDka Nahin Hai

mirā dil is liye dhaḌkā nahīñ hai

palaT kar us ne jo dekhā nahīñ hai

ilāhī maiñ kahāñ par aa ga.ī huuñ

ujālā bhī jahāñ ujlā nahīñ hai

ye aañsū bhī musāfir haiñ jabhī to

unheñ maiñ ne kabhī rokā nahīñ hai

vahī ik ḳhvāb hotā hai asāsa

hamāre paas jo hotā nahīñ hai

to kyā ab zulm had se baḌh gayā hai

jo koī ab talak royā nahīñ hai

palaTnā bhī nahīñ ‘shāhīn’ maiñ ne

aur aage bhī koī rasta nahīñ hai

Leave a Comment