kab logon ne alfaz ke patthar nahin phenke
vo ḳhat bhi magar main ne jala kar nahin phenke
Thahre hue paani ne ishara to kiya tha
kuchh soch ke ḳhud main ne hi patthar nahin phenke
ik tanz hai kaliyon ka tabassum bhi magar kyuun
main ne to kabhi phuul masal kar nahin phenke
vaise to irada nahin tauba-shikani ka
lekin abhi TuuTe hue saghar nahin phenke
kya baat hai us ne miri tasvir ke TukḌe
ghar men hi chhupa rakkhe hain bahar nahin phenke
darvazon ke shishe na badalva.iye ‘nazmi’
logon ne abhi haath se patthar nahin phenke
Leave a Reply