maqtal men chamakti hui talvar the ham log
jaan nazr-guzari pe bhi tayyar the ham log
ham ahl-e-sharaf log the is shahr men lekin
rusva bhi sar-e-kucha-o-bazar the ham log
kaam aate na the ham ko bas ik kar-e-junun ke
duniya ki nigahon men to bekar the ham log
is nisbat-e-haq men ye sharaf kam to nahin hai
zindiq bhi kafir bhi gunahgar the ham log
us ko bhi to kuchh husn ne maghrur kiya tha
kuchh apni ana men bhi giraftar the ham log
kuchh yadon ne us ki hamen nashad kiya hai
kuchh apni tabi.at se bhi bezar the ham log
ab tu ne bhi apnane se inkar kiya hai
a vahshat-e-shab tere aza-dar the ham log
a ‘shahid’-e-ḳhush-baḳht ‘yagana’ se ye kah do
kahte hain ki ‘ghalib’ ke taraf-dar the ham log
Leave a Reply