Bakhsh Layalpuri
tishnagi-e-lab pe ham aks-e-ab likkhenge
jin ka ghar nahin koi ghar ke ḳhvab likhenge
tum ko kya ḳhabar is ki zindagi pe kya biiti
zindagi ke zaḳhmon par ham kitab likkhenge
jis hava ne kaaTi hain ḳhamushi ki zanjiren
us hava ke lahje ko inqalab likkhenge
jhuuT ki parastish men umr jin ki guzri hai
tirgi-e-shab ko vo aftab likkhenge
sher ki sadaqat par ham yaqin rakhte hain
maslahat ke chehron ko ba-naqab likkhenge
suliyon pe jhulega bad-nihad har munsif
munsifi ka jab bhi ham ḳhud nisab likkhenge
gham nahin jo ḳhvabon ki luT ga.i hain ta.abiren
ham nazar ke taqon men aur ḳhvab likkhenge
hirz-e-jan samajhte hain ham vatan ki miTTi ko
apne ghar ke ḳharon ko ham gulab likkhenge
is ghazal ke partav men be-gharon ki baten hain
be-gharon ke naam is ka intisab likkhenge
har dalil kaTenge ham dalil-e-raushan se
‘baḳhsh’ sau savalon ka ik javab likkhenge
Leave a Reply