Tajdar Adil
tilism-e-ishq tha sab us ka saath hone tak
ḳhayal-e-dard na aaya najat hone tak
mila tha hijr ke raste men sub.h ki manind
bichhaḌ gaya tha musafir se raat hone tak
ajiib rang ye basti hai us ki nagri bhi
har ek nahr ko dekha furat hone tak
vo is kamal se khela tha ishq ki baazi
main apni fat.h samajhta tha maat hone tak
hai isti.ara ghazal us se baat karne ka
yahi vasila hai ab us se baat hone tak
main us ko bhulna chahun to kya karun ‘adil’
jo mujh men zinda hai ḳhud meri zaat hone tak
Leave a Reply