Isi KHatir to Uski Aarti Humne Utari Hai

isī ḳhātir to us kī aartī ham ne utārī hai

ġhazal bhī maañ hai aur us kī bhī sheroñ kī savārī hai

mohabbat dharm hai ham shā.iroñ kā dil pujārī hai

abhī firqa-parastoñ pe hamārī nasl bhārī hai

sitāre chāñd sūraj phuul jugnū saath haiñ har-dam

koī sarhad nahīñ aisī ajab duniyā hamārī hai

vo dil ke dard kī ḳhushbū kā aalam hai ki mat pūchho

tumhārī yaad meñ ye umr jannat meñ guzārī hai

ye duniyā kyā sudhāregī hameñ ham to haiñ dīvāne

hamīñ logoñ ne ab tak aql duniyā kī sudhārī hai

Leave a Comment