Naushad Ali
Thokaren kha.iye patthar bhi uThate chaliye
aane valon ke liye raah banate chaliye
apna jo farz hai vo farz nibhate chaliye
gham ho jis ka bhi use apna banate chaliye
kal to aa.ega magar aaj na aa.ega kabhi
ḳhvab-e-ghaflat men jo hain un ko jagate chaliye
azm hai dil men to manzil bhi koi duur nahin
samne aa.e jo divar girate chaliye
nafraten fasle kuchh aur baḌha deti hain
giit kuchh pyaar ke in rahon men gaate chaliye
rah-e-dushvar hai be-saya shajar hain saare
dhuup hai sar pe qadam tez baḌhate chaliye
kaam ye ahl-e-jahan ka hai sunen ya na sunen
apna paigham zamane ko sunate chaliye
dil men so.e hue naghmon ko jagana hai agar
meri avaz men avaz milate chaliye
raste jitne hain sab jaate hain manzil ki taraf
shart-e-manzil hai magar jhumte gaate chaliye
kuchh mile ya na mile apni vafaon ka sila
daman-e-rasm-e-vafa apna baḌhate chaliye
yuun hi shayad dil-e-viran men bahar aa jaa.e
zaḳhm jitne milen siine pe sajate chaliye
jab talak haath na aa jaa.e kisi ka daman
dhajjiyan apne gireban ki uḌate chaliye
shauq se likhiye fasana magar ik shart ke saath
is fasane se mira naam miTate chaliye
aaj ke daur men ‘naushad’ yahi behtar hai
is bure daur se daman ko bachate chaliye
Leave a Reply