Wali Alam Shaheen
thi kuchh na ḳhata phir bhi pasheman rahe hain
kya kya gham-e-halat ke unvan rahe hain
ḳhud jin ko na irfan tha taqdis-e-junun ka
vo bhi miri hasti ke nigahban rahe hain
jin ko miri har baat pe vahshat ka guman tha
vo meri ḳhamoshi ka bura maan rahe hain
dilchasp nazar aa.i thi ye rasm-o-rah-e-dil
par jaan ka ik rog hai ab jaan rahe hain
jo bhi hai use tangi-e-daman ka gila hai
ek ek ko ham duur se pahchan rahe hain
Leave a Reply