thak ga.e ham rasan-o-dar tak aate aate
miT ga.e ishq ke me.aar tak aate aate
raah ke pech muqaddar ki bura.i gham-e-zist
mar na ja.enge tire pyaar tak aate aate
aur bhi chand maqamat-e-talab guzre hain
daar se manzil-e-dildar tak aate aate
vo baḌhe hi the miri samt ki phir ruk se ga.e
rah gaya daman-e-gul ḳhaar tak aate aate
haa.e duniya ka chalan haa.e zamane ki ravish
gham mile kitne gham-e-yar tak aate aate
vo mazamin jo insan ka lahu garma den
ruk ga.e hain mire ash.ar tak aate aate
kitne hathon ne ‘ḳhalish’ khoi hai taqat apni
vaqt ke gesu-e-ḳhamdar tak aate aate
Leave a Reply