Hasan Shahnawaz Zaidi
teri taḳhliq tira rang havala tha mira
kaun kahta hai ki andaz nirala tha mira
main jahan par tha vahin tu tha mire a.ina-gar
teri tasviron se bharpur risala tha mira
chahta tha main dua mangta par kya karta
mere hathon men to labrez piyala tha mira
mujhe pahle ka.i sadiyon ki saza kaTna thi
manzil-e-sub.h se kuchh duur ujala tha mira
main use bhuul gaya taaki use yaad na aa.uun
kitna mahbub mujhe bhulne vaala tha mira
huun tahi-dast magar minnat-e-kashkol nahin
mohr-e-taskin mujhe haath ka chhala tha mira
zahr piite hue ḳhamosh hi rahna tha mujhe
shaḳh-e-taslim se gul-posh piyala tha mira
dusri zindagi dene ki zarurat hi na thi
har na.i shakl ki surat men izala tha mira
ye jo duniya men sar-e-mauj-e-hava likkha hai
mere yaron ne kabhi naam uchhala tha mira
Leave a Reply