teri si bhi aafat koi ai sozish-e-tab hai
ik aag hai so itni jalan aag men kab hai
maana ki tum ummid-e-vafa ke nahin qaa.il
phir kya mire jiine ka koi aur sabab hai
ḳhush huun tire kiine se ki shirkat se huun mahfuz
jitna tire dil men hai vo mere liye sab hai
hajat nahin kuchh aur pas-e-marg magar ek
ya.ani mujhe darkar tiri jumbish-e-lab hai
zinda rahun kyuun main ki zaban un se ho gustaḳh
marne men ḳhamoshi hai ḳhamoshi men adab hai
ho hijr to phir gor men aur ghar men hai kya farq
jo gor ki zulmat hai vahi hijr ki shab hai
iz.har-e-vafa hai to kis ummid pe ai ‘shauq’
tu dad-talab us se ki bedad-talab hai
Leave a Reply