tiri havas men jo dil se puchha nikal ke ghar se kidhar ko chaliye
tadap ke bola jidhar vo nikle shitab usi rahguzar ko chaliye
na chahiye kuchh adam ko le kar nikaliye hasti se jaan de kar
safar jo liije rah-e-khuda men luta ke zad-e-safar ko chaliye
azal se us ka hi aasra hai jo dene vaala muradon ka hai
barae-fil-faur umid-e-dil ko jo chumne us ke dar ko chaliye
idhar to taqdir so rahi hai udhar vo nabud ho rahi hai
visal ki shab ko ro jo chukiye to rone sham-e-sahar ko chaliye
jo haath ik phuul ko lagaen yaqin hai kanton men khinche jaaen
hamare haq men vo hove hanzal jo nosh karne samar ko chaliye
ajiib mushkil hai aah ai dil kathin hai bim-o-raja ki manzil
qadam qadam par ye sochte hain kidhar na chaliye kidhar ko chaliye
tiri judai men jan-e-alam kiya hai donon ko gham ne be-dam
banaiye ja ke dil ki turbat ki dafn karne jigar ko chaliye
hua hai vo shauq-e-did-bazi ki samjhen is ko bhi sarfarazi
bulaen ankhen vo phodne ko to nazr karne nazar ko chaliye
visal ki shab guzar gai hai jo aarzu thi vo mar gai hai
hamen to hichki lagi hui hai vo fikr men hain ki ghar ko chaliye
ye qaaf se qaaf tak hai shohrat karenge vo imtihan-e-vahshat
junun ka aalam ye kah raha hai yahin se takrate sar ko chaliye
jo subh-e-piri hui huvaida sada adam se hui ye paida
namaz padh ke na ab thahariye savere kasiye kamar ko chaliye
luta hai gulshan men ashiyana kahin hamara nahin thikana
qafas se chhut kar bhadak rahe hain ki tinke chunane kidhar ko chaliye
kami na dard-e-jigar men hogi ye ham se aisi ne guftugu ki
dava ko phir DhunDiyega pahle talash karne asar ko chaliye
hamesha har saans ne hamari shab-e-judai men aarzu ki
kisi tarah se tire chaman men nasim ho kar sahar ko chaliye
charagh-e-bazm-e-khuda hua hai khuda ne mahbub use kaha hai
ye shaam se lau lagi hai dil ko ki dekhne us bashar ko chaliye
hamara aansu vo be-baha hai nigah-e-hasrat men jach raha hai
manga ke ab us pe chaurahe men nisar karne guhar ko chaliye
su-e-falak kiije ru-e-taban ki chaudhvin shab pe hai ye nazan
dikha ke husn-e-shabab apna chakor karne qamar ko chaliye
kisi tarah se na hone paae hamare nalon ka faash parda
agarche shor-e-fughan ka apne sharik karne gajar ko chaliye
‘sharaf’ jo ham un pe jaan denge khabar hamari lahad men lenge
hila ke shana jala ke ham ko kahenge uthiye bhi ghar ko chaliye