Shaz Tamkanat
dasht kya shai hai junun kya hai divane ke liye
shahr kya kam hai mujhe ḳhaak uḌane ke liye
ham ne kya janiye kya soch ke gulshan chhoḌa
fasl-e-gul der hi kya thi tire aane ke liye
main sara.e ke nigahban ki tarah tanha huun
haa.e vo log ki jo aa.e the jaane ke liye
ham vahi soḳhta-saman-e-azal hain ki jinhen
zindagi duur tak aa.i thi manane ke liye
dil ki mehrab ko darkar hai ik sham.a faqat
vo jalane ke liye ho ki bujhane ke liye
tu miri yaad se ghafil na tiri yaad se main
ek dar-parda kashakash hai bhulane ke liye
zabt-e-paiham ke nisar ai dil-e-azar-talab
shart-e-daman bhi uTha ashk bahane ke liye
sun mujhe ghaur se sun naghma-e-na-paida huun
koi amada nahin saaz uThane ke liye
harf-e-na-gufta ki rudad liye phirte hain
pahle kahte the ghazal un ko sunane ke liye
dil ki daryuza-gar-e-harf-e-tasalli na raha
ham ne ye rasm uTha di hai zamane ke liye
saans roke hue phirta huun bhare shahr men ‘shaz’
us ne kya raaz diya mujh ko chhupane ke liye
Leave a Reply