teri gali ko chhod ke jaana to hai nahin
duniya men koi aur thikana to hai nahin
ji chahta hai kaash vo mil jaae raah men
halanki mojazon ka zamana to hai nahin
is ghar men us ke naam ka kamra hai aaj bhi
jis ko kabhi bhi laut ke aana to hai nahin
shayad vo rahm kha ke miri jaan bakhsh de
qatil hai koi dost purana to hai nahin
ashkon ko ‘ruhi’ kharch karo dekh-bhal ke
ankhon ke paas koi khazana to hai nahin