teri baton ka ras udasi hai
mere daman men bas udasi hai
dusra jism hai ye miTTi ka
mera pahla qafas udasi hai
dhaḌkanen karvan ḳharabon ka
un ki har ik jaras udasi hai
muzmahil huun baḌe dinon se main
mujh ko banhon men kas udasi hai
ibn-e-adam ke gham batate hain
kaisi kohna-nafas udasi hai
kya dikhata kisi masiha ko
main to samjha tha bas udasi hai
din ḳhushi ke nikal kar dekhe
umr ka har baras udasi hai
dil ka ‘aḳhtar’ mazar siine men
gham hai gumbad kalas udasi hai
Leave a Reply