Faza Ibn E Faizi
chand sansen hain mira raḳht-e-safar hi kitna
chahiye zindagi karne ko hunar hi kitna
chalo achchha hi hua muft luTa di ye jins
ham ko milta sila-e-husn-e-nazar hi kitna
kya pighalta jo rag-o-pai men tha yaḳh-basta lahu
vaqt ke jaam men tha shola-e-tar hi kitna
kis ḳhata par ye uThana paḌi raton ki salib
ham ne dekha tha abhi ḳhvab-e-sahar hi kitna
ham bhi kuchh der ko chamke the ki bas raakh hue
sach to ye hai ki ram-o-raqs-e-sharar hi kitna
tarz-e-ehsas men nudrat thi udhar hi kitni
fikr-o-jazabe men tavazun hai idhar hi kitna
de diye ḳhusrav-o-shirin ne use moḌ ka.i
varna yuun fasla-e-tisha-o-sar hi kitna
tera irfan tu kya ḳhud ko na pahchan saka
tha mira da.ra-e-ilm-o-ḳhabar hi kitna
yak qadam besh nahin shab ki masafat lekin
ek TuuTe hue taare ka safar hi kitna
ai ‘faza’ daman-e-alfaz hai ab bhi ḳhali
tha yahan shaḳh-e-ma.ani pe samar hi kitna
Leave a Reply