vo arz-e-gham pe mashvara-e-iḳhtisar de
kuuze men kaise koi samundar utaar de
duniya ho aḳhirat ho vo sab ko sanvar de
taufiq-e-ishq jis ko bhi parvardigar de
phir davat-e-karam nigah-e-sho.ala-bar de
allah mustaqil mujhe sabr-o-qarar de
jis phuul ka bhi dekhiye daman hai taar taar
kitna baḌa sabaq hamen fasl bahar de
dard-e-jigar shikasta-dili be-qarariyan
kya kya na lutf mujh ko tira intizar de
vaa.iz use batao na jannat ke tum maze
ḳhuld-e-barin ka lutf jise ku-e-yar de
kangan udhar kala.i men ghuma to yuun laga
avaz mujh ko gardish-e-lail-o-nahar de
chehre pe vo saja.e hai ma.asumiyat ka nuur
ab kaun us ko zahmat-e-bos-o-kanar de
main huun shahid-e-rah-e-mohabbat magar ‘alim’
mera ghalat pata miri lauh-e-mazar de
Leave a Reply