Shahryar
tere va.ade ko kabhi jhuuT nahin samjhunga
aaj ki raat bhi darvaza khula rakkhunga
dekhne ke liye ik chehra bahut hota hai
aankh jab tak hai tujhe sirf tujhe dekhunga
meri tanha.i ki rusva.i ki manzil aa.i
vasl ke lamhe se main hijr ki shab badlunga
shaam hote hi khuli saḌkon ki yaad aati hai
sochta roz huun main ghar se nahin niklunga
ta-ki mahfuz rahe mere qalam ki hurmat
sach mujhe likhna hai main husn ko sach likkhunga
Leave a Reply