Tere Wade Ko Kabhi jhuT Nahin Samjhunga

tere va.ade ko kabhī jhuuT nahīñ samjhūñgā

aaj kī raat bhī darvāza khulā rakkhūñgā

dekhne ke liye ik chehra bahut hotā hai

aañkh jab tak hai tujhe sirf tujhe dekhūñgā

merī tanhā.ī kī rusvā.ī kī manzil aa.ī

vasl ke lamhe se maiñ hijr kī shab badlūñgā

shaam hote hī khulī saḌkoñ kī yaad aatī hai

sochtā roz huuñ maiñ ghar se nahīñ niklūñgā

tā-ki mahfūz rahe mere qalam kī hurmat

sach mujhe likhnā hai maiñ husn ko sach likkhūñgā

Leave a Comment