tere nazdik hi har-vaqt bhaTakta kyuun huun
tu bata phuul ke jaisa main mahakta kyuun huun
main na raton ka huun jugnu na koi taara par
us ki ankhon men magar phir bhi chamakta kyuun huun
us paheli ka koi hal to batao yaaro
hijr ki raton men atish sa dahakta kyuun huun
ghar banaya hai tire dil men usi din se sanam
saari duniya ki nigahon men khaTakta kyuun huun
hasidon ko baḌi tashvish hai is ki janam
ban ke dhaḌkan main tire dil men dhaḌakta kyuun huun
jab tujhe mujh se mohabbat nahin ye batla de
qatra qatra tiri ankhon se Tapakta kyuun huun
Leave a Reply