poet

Tere Kuche Ka Rahnuma Chahta Hun

tire kuche ka rahnuma chahta huun

magar ghair ka naqsh-e-pa chahta huun

jahan tak ho tujh se jafa chahta huun

ki main imtihan-e-vafa chahta huun

khuda se tira chahna chahta huun

mera chahna dekh kya chahta huun

kahan rang-e-vahdat kahan zauq-e-vaslat

main apne ko tujh se juda chahta huun

barabar rahi hadd-e-yar-o-mohabbat

kisi ko main be-intiha chahta huun

kahan hai tiri barq-e-josh-e-tajalli

ki main saz-o-barg-e-fana chahta huun

vo jab kho chuke mujh ko hasti se apni

to kahte hain ab main mila chahta huun

junun-e-mohabbat men pand-e-adu kya

bhala main kisi ka bura chahta huun

tabiat ki mushkil-pasandi to dekho

hasinon se tark-e-vafa chahta huun

jo dil main ne chaha to kya khaak chaha

ki dil bhi to be-muddaa chahta huun

ye hasrat ki lazzat ye zauq-e-tamanna

shab-e-vasl un se haya chahta huun

siva is ke main kya kahun tum se ‘asi’

ki darvesh ho tum dua chahta huun

More Poems

Leave a Comment