Nishant Shrivastava Nayab
tere hisse ka bach gaya hai kuchh
meri ankhon men chubh raha hai kuchh
ham bhi mahir hain ab tere fan men
dil men hai kuchh magar kaha hai kuchh
yaad karna tumhen hai aadat men
varna dil men nahin bacha hai kuchh
din men bhi sochte hain ham tujh ko
raat is baat pe ḳhafa hai kuchh
na hua mera aur na us ka hi
dil ke hone ka fa.eda hai kuchh
ik sitare ke TuuT jaane se
arsh ka bojh baḌh gaya hai kuchh
teri ankhen jise mayassar hon
phir kahan us ko aa.ina hai kuchh
jaan nikli na tere jaane pe
mere haq men ajab saza hai kuchh
sirf mere nahin hain ye aansu
in men hissa raqib ka hai kuchh
ab dua.en miri nahin sunta
arsh buḌha sa ho gaya hai kuchh
Leave a Reply