Poet
tire falak pe kahin mera mahtab nahin
vo raushni ka vasila tire janab nahin
ganva chuka hai tu saqi-e-hauz-e-kausar ko
ki tere zarf men ab tak sharab-e-nab nahin
tiri zaban pe allah-hu ka na.ara hai
tire shi.ar men allah ki kitab nahin
tu ro raha hai bina maqsad-e-husaini ke
tiri aza men kahin zainabi-nisab nahin
tiri nigah-e-talabgar did-e-mehdi hai
tire irade men garmi-e-inqalab nahin
tiri zamin pe taghut ki hukumat hai
tire mizaj men bu-zar ka iztirab nahin
jo reg-zar ko zarḳhez-o-zarfishan kare
tire vajud ke sahra pe vo sahab nahin
Leave a Reply