Naresh Kumar Shad
tira tazkira su-ba-su kyuun karen ham
mohabbat ko be-abru kyuun karen ham
likhi hai muqaddar men na-kamyabi
karen to gham-e-arzu kyuun karen ham
agar rang-o-bu is chaman ka hai faani
nazar ma.il-e-rang-o-bu kyuun karen ham
hasinon ka pas-e-vafa ghair-mumkin
hasinon se ye aarzu kyuun karen ham
adavat hi jab hasil-e-dosti hai
mohabbat ki phir aarzu kyuun karen ham
karen kyuun tumhare sitam ki shikayat
mohabbat ko be-abru kyuun karen ham
agar ‘shad’ ham ḳhud hi kho.e hue hain
kisi aur ki justuju kyuun karen ham
Leave a Reply