tirā lahja tirī pahchān mubārak ho tujhe
tirī vahshat tirā haijān mubārak ho tujhe
maiñ mohabbat kā pujārī huuñ so maiñ jaatā huuñ
ya.anī nafrat kā ye sāmān mubārak ho tujhe
aañkh meñ tanz-o-ra.ūnat kī chamak baaqī rahe
lab pe ye talḳh sī muskān mubārak ho tujhe
maiñ duā kartā huuñ tū shahr-e-charāġhāñ meñ rahe
tirā har ḳhvāb-e-gulistān mubārak ho tujhe
tū hukūmat kā hai shauqīn tirā bantā hai
bebasī shahr kī sultān mubārak ho tujhe
maiñ to mar kar bhī mirī jaan bachā lūñgā use
tujh meñ martā huā insān mubārak ho tujhe
jā rahā huuñ maiñ tire shahr se yādeñ le kar
mire dilbar tirā multān mubārak ho tujhe
ye bichhaḌnā hī agar hal hai to ranjish kaisī
jaao nā jaao mirī jaan mubārak ho tujhe