Ada Jafarey
taufiq se kab koi sarokar chale hai
duniya men faqat tala-e-bedar chale hai
thahrun to chatanon si kaleje pe khadi hai
jaun to mire saath hi divar chale hai
har ghuncha bade chaav se khilta hai chaman men
har daur ka mansur sar-e-dar chale hai
rangon ki na khushbu ki kami hai dil-o-jan ko
tosha jo chale saath vo ik khaar chale hai
dil ke liye bas aankh ka meaar bahut hai
jo sikka-e-jan hai sar-e-bazar chale hai
hairat se shagufon ki jhapakti nahin ankhen
kis aan se kanton ka kharidar chale hai
khurshid vahan ham ne sulagte hue dekhe
kirnon ka jis ashob men bevpar chale hai
ik jumbish-e-mizhgan ki ijazat bhi nahin hai
dil saath chala hai ki sitamgar chale hai
the khizr bhi lakhon yahan iisa bhi bahut the
azar jo dil ka hai so azar chale hai
Leave a Reply