tark-e-jām-o-subū na kar paa.e
is liye ham vazū na kar paa.e
vaqt-e-āḳhir bhī hazrat-e-nāseh
apnā muñh qibla-rū na kar paa.e
us kī rahmat ke sā.ebān meñ thā
merā shak bhī adū na kar paa.e
maslahat kī khaḌī thī jo dīvār
duur us ko kabhū na kar paa.e
umr bhar dūsroñ kī fikr rahī
apnā dāman rafū na kar paa.e
haa.e majbūriyāñ ki us ke huzūr
pesh apnā lahū na kar paa.e
kar lī kamre meñ ḳhud-kushī ‘ājiz’
us se jab guftugū na kar paa.e